ഉള്ളിവടയിലെ ഉള്ളി

ഗൾഫിലെ ഒരു മലയാളി ഹോട്ടൽ.
മസാല ദോശ, ഇഡ്ഡലി, ഉഴുന്നുവട, ഉള്ളിവട തുടങ്ങി എല്ലാം പേരുകേട്ടവ.
ഇന്ത്യക്കാരുടേയും, പാക്കിസ്ഥാൻ, ബംഗ്ലാദേശ്, ഫിലിപ്പീൻസ് തുടങ്ങിയവരുടേയും വലിയ തിരക്കാണ് എപ്പോഴും.
ഒരു മലയാളി കടയിൽ കയറി.
ഉള്ളിവട വാങ്ങിത്തിന്നു.
പകുതി തിന്നപ്പോൾ അതിനുള്ളിൽ ഒരു പാറ്റ മൊരിഞ്ഞിരിക്കുന്നു.
അയാൾ കയർത്തു.
“ഇത് ഇപ്പോൾ ഞാൻ റിപ്പോർട്ട് ചെയ്യും. ഈ കട ഞാൻ പൂട്ടിക്കും.”
മലയാളി മാനേജർ വന്നു നോക്കി.
പാറ്റയെ എടുത്തു.
“ഓ! ഇതാണോ? ഇത് ഉള്ളിയുടെ ഒരു ഭാഗമല്ലേ?”
അയാൾ അത് വായിലിട്ട് ചവച്ചിറക്കി.
“ഇദ്ദേഹത്തിന് ഒരു ഉഴുന്നുവട കൊടുക്ക്.”
മാനേജർ നിർദ്ദേശിച്ചു.

സോമദാസ്