കലണ്ടർ

കുട്ടികൾ കലണ്ടർ നോക്കി ചുവന്ന അക്കങ്ങൾ എണ്ണി തിട്ടപ്പെടുത്തിക്കൊണ്ടിരിക്കുന്നു. കുട്ടികൾക്കും മുതിർന്നവർക്കും കലണ്ടറിലെ ചുവന്ന അക്കങ്ങൾ സന്തോഷത്തെ നൽകുന്നതാണ്. ഉദ്യോഗസ്ഥർക്ക് ചുവന്ന അക്കം വളരെ പ്രധാനമാണ്. കലണ്ടർ മറിച്ചുകൊണ്ടിരുന്ന കുട്ടികൾ കൂടുതൽ ചുവന്ന അക്കങ്ങൾ കണ്ട് സന്തോഷിക്കുന്നു. പത്തു ദിവസം ഓണം അവധി. ഈ ദിവസം അച്ഛൻ വരും. ഇനി എത്ര ദിവസമുണ്ടെന്ന് അവർ കണക്കാക്കുന്നു. കലണ്ടർ കൊണ്ട് പല ആളുകൾക്കും പല ഉപയോഗങ്ങളാണ്. ജീവിതം കലണ്ടറുമായി വളരെയധികം ബന്ധപ്പെട്ടിരിക്കുന്നു. എന്റെ വീട്ടിലെ കലണ്ടർ മുഴുവൻ പാലിന്റെ കണക്കാണ്. ചിലർ തങ്ങളുടെ ജീവിതത്തിലെ ഓരോ ദിവസത്തേയും പരിപാടികൾ കലണ്ടറിൽ കുറിച്ചിടുന്നു. തിരക്കുപിടിച്ച ജീവിതത്തിൽ അത് അത്യാവശ്യമാണ്.

കലണ്ടർ നോക്കി ഒരു വർഷത്തെ പ്രധാനപ്പെട്ട ആഘോഷങ്ങൾ, വാർഷികപരിപാടികൾ എന്നിവ നേരത്തെ മനസ്സിലാക്കിയിരിക്കാം. എന്നാൽ ഏതെങ്കിലും ഒരു തീയതി നോക്കി, ഈ ദിവസം ഇന്നിന്നകാര്യങ്ങൾ സംഭവിക്കും എന്നറിയാൻ കഴിയില്ല. ഈ വർഷം ഇത്രാം തീയതി ഉണ്ടെന്നും അത് ആഴ്ചയിൽ ഇന്ന ദിവസമാണെന്നും കലണ്ടർ നോക്കി നമുക്ക് പറയാൻ കഴിയും. ഒരു വർഷത്തെ ഏതെങ്കിലും ഒരു തീയതി പറഞ്ഞാൽ അത് ഏതു ദിവസമാണെന്നു ചിലർ പെട്ടെന്ന് പറയും. എന്നാൽ ആ ദിവസം എന്തെല്ലാം  സംഭവങ്ങൾ തനിക്കും മറ്റുള്ളവർക്കും ലോകത്തിനും സംഭവിക്കും എന്ന് ആർക്കും പറയാൻ കഴിയില്ല. എന്നുകരുതി ആ ദിവസം സംഭവിക്കുന്നതൊക്കെ യാദൃശ്ചികമായി സംഭവിക്കുന്നതാണെന്ന് കരുതുന്നത് ശരിയല്ല. കാരണം, അങ്ങനെയൊരു ദിവസമുണ്ടെങ്കിൽ ആ ദിവസത്തെ ഓരോ മണിക്കൂറും മിനിട്ടും സെക്കന്റും ഉണ്ടായിരിക്കും. ആ സമയങ്ങളിൽ ഓരോരുത്തർക്കും ഇന്നിന്ന സംഭവങ്ങൾ ഉണ്ടാകുമെന്നും ഉണ്ടായിരിക്കും. എന്നാൽ ആ ദിവസം നമ്മിൽ നിന്നും അകലെയായിരിക്കുന്നതുപോലെ, ആ ദിവസത്തെ സംഭവങ്ങളും നമ്മിൽ നിന്നും അകലെയാണ്. അത് അജ്ഞാതവുമായിരിക്കുന്നു. അറിയാൻ കഴിയാത്തതുകൊണ്ട് ഇല്ല എന്നു ധ്വനിക്കുന്നില്ല. കാരണം, നമുക്കറിയില്ലായിരുന്നെങ്കിലും, ഏതെങ്കിലും ഒരു ദിവസം കലണ്ടറിൽ അടയാളപ്പെടുത്തിയാൽ ആ ദിവസം വരികയും അന്നു സംഭവിക്കാനുള്ളതെല്ലാം സംഭവിക്കുകയും ചെയ്യുമല്ലൊ! അപ്പോൾ, സംഭവങ്ങൾ മാത്രമേ നമ്മിൽ നിന്നും മറഞ്ഞിരിക്കുന്നുള്ളൂ എന്ന് വ്യക്തം.

നൂറ്റിപ്പത്ത് നിലകളുണ്ടായിരുന്ന അമേരിക്കയിലെ   “വേൾഡ് ട്രേഡ് സെന്ററി“ന്റെ ശിലാസ്ഥാപനം വർഷങ്ങൾക്കുമുമ്പാണ് നടന്നത്. ആദ്യത്തെ കല്ല് ഇത്രാം വർഷം ഇത്രാം തീയതി ഇന്നസമയത്തായിരുന്നു വച്ചത് എന്ന് പറയാൻ സാധിക്കും. അങ്ങനെ വച്ചപ്പോൾ തന്നെ 2001 സെപ്റ്റംബർ 11 എന്നൊരു തീയതിയും മറ്റ് തീയതികളുടെ കൂട്ടത്തിൽ കലണ്ടറിൽ ഉണ്ടായിരുന്നു. എന്നാൽ ആ ദിവസത്തെ പ്രാധാന്യം ലോകത്ത് ആർക്കും മുൻ‌കൂട്ടി അറിയാൻ കഴിഞ്ഞില്ല. കൃത്യം ആ തീയതി ആ സമയം സൗധം നാമാവശേഷമായി. സൗരയൂഥങ്ങൾക്കും ആകാശ ഗോളങ്ങൾക്കും ഇത് ബാധകമാണ്. അങ്ങനെവരുമ്പോൾ ഭൂമിയിൽ വസിക്കുന്ന ജീവജാലങ്ങളുടേയും മറ്റു വസ്തുക്കളുടേയും കാര്യം പറയാനുണ്ടോ? ഒരു സിനിമ സീഡിയിൽ ഫീഡുചെയ്തുവച്ചിരിക്കുന്നതുപോലെ, ഈ ബ്രഹ്മാണ്ഡരൂപീകരണവും അവസാനവും രേഖപ്പെടുത്തി വച്ചിട്ടുണ്ട്. അതിന്റെ അറിവ് നിഗൂഢവും ശ്രേഷ്ഠവുമാണ്. ഇത് ഗ്രഹിച്ചവരാണ് താഴപ്പറയുന്നത് രേഖപ്പെടുത്തി വച്ചിരിക്കുന്നത്:

“കാലോ ഭൂതി മസൃജത്

കാലേ തപതി സൂര്യഃ

കാലേഹ വിശ്വ ഭൂതാനി

കാലേ ചക്ഷുർ പ്രപശ്യതി.”

സാരം :- “സമയം ലോകത്തെ സൃഷ്ടിച്ചു. സൂര്യൻ പ്രകാശിക്കുന്നതും സമയത്തിന്റെ പ്രഭാവം കൊണ്ടുതന്നെ. സമയമാണ് എല്ലാ സൃഷ്ടികളുടേയും ആധാരം. നമ്മുടെ എല്ലാ ഇന്ദ്രിയങ്ങളും സമയത്തെ ആസ്പദമാക്കി പ്രവർത്തിക്കുന്നു.“

മേൽ‌പ്പറഞ്ഞ ദർശനത്തിൽ ‘സമയം’ എന്ന സ്ഥലത്തൊക്കെ ‘കലണ്ടർ’ എന്നു ചേർത്തു ചിന്തിച്ചാലോ എന്ന് ഞാൻ ഓർത്തുപോകുന്നു.

സോമദാസ്