ദു:ഖം നൽകരുതെന്നപോൽ
ദു:ഖം വാങ്ങരുതെന്നതും
നല്ല ലക്ഷണമാകുന്നു
നല്ല ചിന്തയതെന്നതും.
ഈശ്വരൻ കല്ലല്ലെന്ന്
അറിയുന്നു സത്യദർശികൾ.
കല്ലും ദൈവമാണെന്നു
കാണുന്നു തത്വദർശികൾ.
ഏഴു സമുദ്രങ്ങൾ തന്നെ
ജ്ഞാനമാണെന്നിരിക്കിലോ
ഏകതുള്ളി ജലം പോലും
എന്റെ കയ്യിലതില്ലെടോ.
ബന്ധുവല്ലാത്തവരേ നാം
അന്യരായി ഗണിച്ചിടും
ജ്ഞാനിക്ക് അന്യരേയില്ല
എല്ലാം ബന്ധുക്കൾ മാത്രമാം.
ഒരേ സ്ഥാനത്തു നിൽക്കാതെ
ഒരേ വേഗത്തിൽ നിത്യവും
സഞ്ചരിക്കുന്നതൊന്നാണ്
സമയം എന്ന അത്ഭുതം
ആകാശമാർഗ്ഗേ പക്ഷികൾ
പറന്നീടുന്നതെങ്കിലും
ആകാശം തന്റേതാണെന്ന്
പക്ഷികൾ കരുതില്ലിഹ.
വിദ്യാഭ്യാസമെന്നൊന്നും
അവിദ്യാഭ്യാസമെന്നതും
രണ്ടും അഭ്യാസമാകുന്നു
കായികാഭ്യാസമെന്നപോൽ.
നല്ലവാക്കുര ചെയ്യുന്നോർ
അതുതന്നെ ചൊല്ലിയാൽ മതി
ദുർവാക്കു മാത്രം തോന്നുന്നോർ
മൗനിയാകുന്നതുത്തമം.
മുല്ലപ്പൂവിൻ സുഗന്ധത്തിൽ
കണ്ണിന്നെന്തു പ്രയോജനം
താമരപ്പൂവിൻ ചന്തത്തെ
നാസിക ഗ്രഹിച്ചീടുമോ?
ഇന്ദ്രിയങ്ങളതോരോന്നും
ഓരോ കാരണത്തിൻ മാത്രമായ്
ചേരും വിധേന ചേർത്താലേ
പ്രയോജനമതായ് വരൂ.
മേഘനാദം ഭയത്തേയും
സംഗീതം സന്തോഷത്തെയും
ഭാവങ്ങൾ നമ്മിലാക്കുന്നു
രണ്ടും ശബ്ദങ്ങൾ തന്നെയും.
സോമദാസ്
No comments:
Post a Comment